குறிக்கோள்கள்

இலங்கை அணுசக்தி சபை 2014 ஆம் ஆண்டின் 40 ஆம் இலக்க இலங்கை அணுசக்திச் சட்டத்தின் கீழ் நிறுவப்பட்டது. 1969 ஆம் ஆண்டின் 19 ஆம் இலக்க இலங்கை அணுசக்தி அதிகாரசபைச் சட்டம் இரத்துச் செய்யப்பட்டு, 2015 ஜனவரி 01 ஆம் திகதி முதல் நடைமுறைக்கு வரும் வகையில் அணுசக்தி சபை நிறுவப்பட்டது. புதிய சட்டத்தின் கீழ் இலங்கை அணுசக்தி சபை மற்றும் இலங்கை அணுசக்தி ஒழுங்குமுறைச் சபை ஆகிய இரண்டு நிறுவனங்கள் நிறுவப்பட்டன. சமூக மற்றும் பொருளாதார அபிவிருத்தி முயற்சிகளுக்காக அணுவியல் விஞ்ஞானம் மற்றும் தொழில்நுட்பத்தின் அமைதியான பயன்பாடுகளை மேம்படுத்துவதும் அவற்றை எளிதாக்குவதும் இலங்கை அணுசக்தி சபைக்கு பொறுப்பளிக்கப்பட்டுள்ளதுடன், ஒழுங்குமுறை நடவடிக்கைகளை இலங்கை அணுசக்தி ஒழுங்குமுறைச் சபை மேற்கொள்கிறது.

இலங்கை அணுசக்தி சபை தனது நோக்கங்களை நிறைவேற்றுவதற்குத் தேவையான சிறப்பு தொழில்நுட்பத் திறன்களைப் பெற்றுக்கொண்டு தனது பணிகளை முன்னெடுத்து வருகிறது. இலங்கை அணுசக்தி சபைக்கு சட்டரீதியாக ஒப்படைக்கப்பட்டுள்ள கட்டாயப் பணிகளை அர்ப்பணிப்புடன் நிறைவேற்றுவதுடன், தொழில்நுட்பத் துறைகளில் ஒத்துழைப்பை மேம்படுத்துவதற்கும் தரத்தை உயர்த்துவதற்கும் தேவையான தொழில்நுட்ப ஒருங்கிணைப்பு வசதிகளையும் வழங்கி வருகிறது.